नेप्सेमा रिलायन्स स्पिनिङ मिल्स र सालपा विकास बैंकका शेयर एकैसाथ सूचीकृत

नेपाल स्टक एक्सचेन्ज (नेप्से) मा दुई कम्पनीका साधारण शेयर एकैसाथ सूचीकृत भएका छन्। नेप्सेले आज मिति २०८२ फागुन १ गते Reliance Spinning Mills Limited (RSML) र Salpa Bikas Bank Limited (SABBL) का साधारण शेयर सूचीकरण गरेको हो।

नेप्सेले जनाएको अनुसार यी दुवै कम्पनीका शेयर आगामी २०८२ फागुन ४ गतेदेखि दोस्रो बजारमा कारोबारका लागि खुल्नेछन्।

रिलायन्स स्पिनिङ मिल्स लिमिटेड

रिलायन्स स्पिनिङ मिल्सको प्रतिकित्ता १०० रुपैयाँ अंकित मूल्यका कुल १ करोड ९० लाख कित्ता साधारण शेयर सूचीकृत भएका छन्। यसमध्ये संस्थापक शेयरधनीको ८९.८६ प्रतिशत (१ करोड ७० लाख ७३ हजार ४ सय कित्ता) र सर्वसाधारणको १०.१४ प्रतिशत (१९ लाख २६ हजार ६ सय कित्ता) हिस्सा रहेको छ।

काठमाडौँको कमलादीमा प्रधान कार्यालय रहेको यस कम्पनीको शेयर निष्कासन तथा बिक्री प्रबन्धक Global IME Capital Limited रहेको थियो।

सालपा विकास बैंक लिमिटेड

त्यसैगरी, सालपा विकास बैंकको प्रतिकित्ता १०० रुपैयाँ अंकित मूल्यका कुल ५२ लाख २३ हजार ८८० कित्ता साधारण शेयर सूचीकृत भएका छन्। सूचीकरण सम्झौताअनुसार संस्थापक शेयरधनीको ६७ प्रतिशत (३५ लाख कित्ता) र सर्वसाधारणको ३३ प्रतिशत (१७ लाख २३ हजार ८८० कित्ता) स्वामित्व रहेको छ।

खोटाङको दिक्तेलमा प्रधान कार्यालय रहेको यस बैंकको शेयर निष्कासन तथा बिक्री प्रबन्धक Muktinath Capital Limited रहेको थियो।

ओपनिङ रेन्ज सम्बन्धी व्यवस्था परिमार्जन

नेप्सेले धितोपत्र सूचीकरण विनियमावली, २०७५ अनुसार माघ २९ गते नै यी दुवै कम्पनीको शेयर सूचीकरण गर्ने निर्णय गरेको थियो। यससँगै, नेप्सेले ओपनिङ रेन्जसम्बन्धी व्यवस्था परिमार्जन गरेको छ।

यसअघि कम्पनीको नेटवर्थको तीन गुणासम्म ओपनिङ रेन्ज दिइने व्यवस्था थियो। हाल भने फेस भ्यालुको तीन गुणामात्रै ओपनिङ रेन्ज तोकिएको छ।

• पोजेटिभ नेटवर्थ भए फेस भ्यालुको तीन गुणा

• नेगेटिभ नेटवर्थ भए सोही नेटवर्थको तीन गुणा

उदाहरणका लागि, नेटवर्थ १२० रुपैयाँ भए अधिकतम ३०० रुपैयाँ र ९० रुपैयाँ भए २७० रुपैयाँसम्म ओपनिङ रेन्ज तोकिनेछ।

लगानीकर्तामा प्रभाव

परिमार्जित ओपनिङ रेन्जका कारण रिलायन्स स्पिनिङ मिल्सका शेयरधनीले पहिलो कारोबारमै घाटामा शेयर बिक्री गर्नुपर्ने अवस्था आउन सक्ने देखिएको छ। तर सालपा विकास बैंकको हकमा भने यस्तो जोखिम कम रहनेछ।

अब लगानीकर्ताले आगामी फागुन ४ गते सोमबारदेखि यी दुवै कम्पनीका शेयर दोस्रो बजारमा खरिद–बिक्री गर्न सक्नेछन्।