श्री एयरलाइन्सले प्रिमियम मूल्यमा ६३ लाख कित्ता आईपीओ ल्याउने तयारी

काठमाडौं । निजी क्षेत्रको आन्तरिक हवाई सेवा प्रदायक श्री एयरलाइन्स लिमिटेडले प्रिमियम मूल्यमा प्रारम्भिक सार्वजनिक निष्कासन (आईपीओ) ल्याउने तयारी गरेको छ। कम्पनीले प्रतिकित्ता २०० रुपैयाँ दरमा ६३ लाख कित्ता साधारण सेयर निष्कासन गर्न अनुमति माग्दै नेपाल धितोपत्र बोर्ड (सेबोन) मा आवेदन दिएको हो।कम्पनीले प्रतिकित्ता १०० रुपैयाँ अंकित मूल्यमा थप १०० रुपैयाँ प्रिमियम जोडेर सेयर जारी गर्ने प्रस्ताव गरेको जनाएको छ। प्रस्तावित आईपीओ स्वीकृत भए कम्पनीले कुल १ अर्ब २६ करोड रुपैयाँ बराबरको पूँजी सर्वसाधारणबाट संकलन गर्नेछ।आईपीओ निष्कासनका लागि बिक्री प्रबन्धकको जिम्मेवारी हिमालयन क्यापिटल लिमिटेडले लिएको छ।उपलब्ध वित्तीय विवरणअनुसार आर्थिक वर्ष २०७७/७८ देखि आर्थिक वर्ष २०८१/८२ को पुस मसान्तसम्म कम्पनीले १५ अर्ब ६३ करोड रुपैयाँभन्दा बढी आम्दानी गरेको छ। चालु आर्थिक वर्षको पहिलो छ महिनामै कम्पनीले २ अर्ब ५७ करोड रुपैयाँ आम्दानी गरेको कम्पनीले जनाएको छ।हाल श्री एयरलाइन्ससँग १८ वटा वायुयान सञ्चालनमा रहेका छन्। तीमध्ये ३ वटा जेट विमान, ७ वटा टर्बोप्रोप जहाज र ८ वटा हेलिकोप्टर रहेका छन्।कम्पनीका प्रमुख लगानीकर्ता सुधीर मित्तल हुन्। सन् १९९९ मा ‘अनन्या एयर’ नामबाट स्थापना भएको कम्पनीलाई पछि ‘श्री एयरलाइन्स’ नाम दिइएको हो। सन् २०२३ मा कम्पनी पब्लिक कम्पनीमा रूपान्तरण भएको थियो।हाल श्री एयरलाइन्सले काठमाडौँलाई आधार बनाएर धनगढी, सुर्खेत, नेपालगञ्ज, भैरहवा, पोखरा, चितवन र विराटनगरमा नियमित आन्तरिक उडान सञ्चालन गर्दै आएको छ। साथै माउन्टेन फ्लाइट तथा हेलिकोप्टरमार्फत चार्टर सेवा पनि प्रदान गर्दै आएको कम्पनीले जनाएको छ।