सिम्रिक एयरको साधारण सभा फागुन २८ गते, आईपीओ निष्कासनको प्रस्ताव

काठमाडौं: सिम्रिक एयर लिमिटेडले वार्षिक साधारण सभा (एजीएम) आह्वान गरेको छ। फागुन ५ गते बसेको कम्पनीको सञ्चालक समितिको बैठकले आगामी फागुन २८ गते साधारण सभा आयोजना गर्ने निर्णय गरेको हो।

सभा काठमाडौं महानगरपालिका–३२ स्थित कम्पनीको रजिष्टर्ड कार्यालयमा साँझ ५ बजे सुरु हुनेछ।

सभामा आर्थिक वर्ष २०८१/८२ को सञ्चालक समितिको वार्षिक प्रतिवेदनमाथि छलफल गरी पारित गरिनेछ। साथै, सोही अवधिको लेखापरीक्षित आर्थिक विवरण (नाफा–नोक्सान हिसाब, वासलात, नगद प्रवाह विवरण) तथा लेखापरीक्षकको प्रतिवेदन अनुमोदन गरिने कार्यसूची रहेको छ।

विशेष प्रस्तावअन्तर्गत कम्पनीलाई नेपाल धितोपत्र बोर्डमा दर्ता गरी सर्वसाधारणका लागि प्राथमिक सेयर (आईपीओ) निष्कासन गर्ने प्रस्ताव पारित गरिनेछ। आवश्यक परे कम्पनीको प्रबन्धपत्र तथा नियमावली संशोधन गर्ने एजेन्डा पनि समावेश गरिएको छ।

त्यसैगरी, आर्थिक वर्ष २०८२/८३ का लागि लेखापरीक्षक नियुक्ति तथा पारिश्रमिक निर्धारण गर्ने प्रस्ताव पेश गरिनेछ। सेयरधनीलाई नगद लाभांश वितरणसम्बन्धी प्रस्ताव पनि छलफलका लागि समावेश गरिएको छ।