सोपान फर्मास्यूटिकल्सको आईपीओ वैशाख २ देखि खुल्ने, ३४ लाख बढी कित्ता सर्वसाधारणका लागि

काठमाडौं — सोपान फर्मास्यूटिकल्स लिमिटेडले सर्वसाधारण लगानीकर्ताका लागि प्राथमिक शेयर (आईपीओ) निष्काशन गर्ने तयारी पूरा गरेको छ। कम्पनीले वैशाख २ गतेदेखि दोस्रो चरणअन्तर्गत सर्वसाधारणका लागि शेयर बिक्री खुला गर्ने जनाएको हो।यसअघि कम्पनीले वैदेशिक रोजगारीमा रहेका नेपालीहरूका लागि छुट्याइएको शेयर बाँडफाँट गरिसकेको छ। अब सर्वसाधारणका लागि ३४ करोड ७४ लाख ९० हजार रुपैयाँ बराबरको प्रतिकित्ता १०० रुपैयाँ अंकित दरका ३४ लाख ७४ हजार ९०० कित्ता शेयर निष्काशन गर्न लागिएको छ।कम्पनीले कुल १ अर्ब ७१ करोड ६० लाख रुपैयाँ जारी पूँजीको २५ प्रतिशत बराबर ४२ लाख ९० हजार कित्ता शेयर निष्काशन गर्ने अनुमति पाएको हो। यसमध्ये ४ लाख २९ हजार कित्ता वैदेशिक रोजगारीमा रहेका नेपालीहरू, १ लाख ७१ हजार ६०० कित्ता कर्मचारी र २ लाख १४ हजार ५०० कित्ता सामूहिक लगानी कोषका लागि छुट्याइसकिएको छ।आईपीओमा न्यूनतम १० कित्ता र अधिकतम ११ हजार कित्तासम्म आवेदन दिन सकिनेछ। आवेदन वैशाख ६ गतेसम्म खुला रहनेछ भने सो अवधिमा पूर्ण आवेदन नपरेमा वैशाख १६ गतेसम्म म्याद थपिने व्यवस्था गरिएको छ।शेयर निष्काशन तथा बिक्री प्रबन्धकको जिम्मेवारी एनएमबि क्यापिटल लिमिटेडले पाएको छ। लगानीकर्ताले आस्बा सदस्य बैंक तथा वित्तीय संस्था मार्फत सि–आस्बा प्रणाली वा मेरो शेयर अनलाइन प्लेटफर्म प्रयोग गरी आवेदन दिन सक्नेछन्।आईपीओको जोखिम मूल्याङ्कनतर्फ केयर रेटिङ्ग नेपालले कम्पनीलाई ‘केयरएनपी सिंगल बी’ इस्यूअर रेटिङ्ग दिएको छ, जसले कम्पनीको दायित्व बहन क्षमतामा तुलनात्मक रूपमा उच्च जोखिम रहेको संकेत गर्दछ।कम्पनीले सार्वजनिक गरेको विवरण अनुसार लगानी फिर्ता अवधि ८.११ वर्ष रहेको छ भने छुट दरमा ११.३५ वर्ष लाग्ने अनुमान गरिएको छ। आन्तरिक प्रतिफल दर २३.६३ प्रतिशत देखाइएको छ भने खुद वर्तमान मूल्य १५ अर्ब ९७ करोड रुपैयाँभन्दा बढी रहेको उल्लेख गरिएको छ।