सूर्यज्योति लाइफ इन्स्योरेन्सको ५ लाख संस्थापक शेयर लिलामीमा, लगानीकर्तालाई खुला अवसर

काठमाडौं — सूर्यज्योति लाइफ इन्स्योरेन्स कम्पनी लिमिटेडका संस्थापक समूहअन्तर्गत रहेका ५ लाख कित्ता शेयर लिलामी प्रक्रियामार्फत बिक्रीमा ल्याइएको छ। कम्पनीले शिलबन्दी बोलपत्रमार्फत शेयर बिक्री गर्ने निर्णय गर्दै इच्छुक व्यक्ति, कम्पनी तथा संघ–संस्थालाई आवेदन दिन आह्वान गरेको हो।सूचना अनुसार बोलपत्र पेश गर्ने प्रक्रिया चैत १८ गतेबाट सुरु भएको छ भने चैत २५ गतेसम्म आवेदन दिन सकिनेछ। इच्छुक लगानीकर्ताले आफूले खरिद गर्न चाहेको दर प्रस्ताव गर्दै रिलायबल इन्भेष्टमेन्ट एण्ड मर्चेन्ट क्यापिटल लिमिटेड, बालुवाटारमा गोप्य शिलबन्दी आवेदन पेश गर्नुपर्नेछ।कम्पनीले प्रति शेयर न्यूनतम मूल्य २४० रुपैयाँ तोकेको छ। सोभन्दा कम दरमा पेश गरिएका आवेदनलाई मान्यता दिइने छैन। साथै आवेदन गर्दा सम्पूर्ण शेयर कित्ताका लागि नै बोलपत्र दिनुपर्नेछ र नियामक निकायले तोकेको अधिकतम सीमा ननाघ्ने गरी मात्र आवेदन दिन सकिने व्यवस्था गरिएको छ।बोलपत्र प्रक्रियामा सहभागी हुन चाहने लगानीकर्ताले आफूले प्रस्ताव गरेको कुल रकम बराबरको ‘गुड फर पेमेन्ट चेक’ धरौटीका रूपमा पेश गर्नुपर्नेछ। छनोटमा नपरेका आवेदकको रकम भने आईपीएसमार्फत फिर्ता गरिने कम्पनीले जनाएको छ।शेयर बाँडफाँड गर्दा पहिलो प्राथमिकता विद्यमान संस्थापक शेयरधनीलाई दिइनेछ। त्यसपछि बाँकी रहेको शेयर उच्च दर प्रस्ताव गर्ने योग्य आवेदकलाई वितरण गरिनेछ। अन्तिम स्वीकृति भने कम्पनीको सञ्चालक समितिबाट हुने र आवश्यक परे नियामक निकायको स्वीकृति समेत लिनुपर्नेछ।बोलपत्र खोल्ने कार्य चैत २६ गते बिहान ११ बजे गरिने तय गरिएको छ। यस लिलामीले बीमा क्षेत्रमा संस्थापक तहको लगानी विस्तारका लागि महत्वपूर्ण अवसर सिर्जना गर्ने अपेक्षा गरिएको छ।