पश्चिम एसिया युद्धले प्लास्टिक उद्योग संकटमा, स्लाइन उत्पादन प्रभावित

विराटनगर । पश्चिम एसियामा जारी युद्धका कारण प्लास्टिकको बोतल बनाउने कच्चा पदार्थ अभाव हुँदा सुनसरी–मोरङ औद्योगिक क्षेत्रका उद्योग संकटमा छन्। मोरङको बूढीगंगास्थित एलेक्जा लाइफ साइन्सेस प्रा. लि.ले बिहीबारदेखि आफ्नो स्लाइन पानी उत्पादन बन्द गरेको छ। यस उद्योगले दैनिक ३० हजार बोतल स्लाइन उत्पादन गर्दै आएको थियो।वीरगञ्जस्थित एभरेष्ट प्यारेन्टेरल प्रा. लि.को उत्पादन १५ प्रतिशतमा घटेको छ। उद्योगका सञ्चालक उमंग सरियाका अनुसार दैनिक १५ हजार बोतल मात्र उत्पादन भइरहेको छ। एमएम प्लास्टिक उद्योगले उत्पादन थप सातासम्म मात्र चलाउन सक्ने अवस्था रहेको छ।इरान, इजरायल र अमेरिकाबीचको युद्धका कारण प्लास्टिक, औषधि, खाद्य तेल, कपडा, जुत्ता र निर्माण सामग्रीमा कच्चा पदार्थको अभाव देखिएको छ। उद्योगीले भने, मूल्य दुई–तीन गुणासम्म बढ्दा पनि आपूर्ति हुन नसक्दा धेरै उद्योग बन्द हुने अवस्थामा पुगेका छन्।विशेषगरी प्लास्टिक दानाको अभावले प्याकेजिङ, पाइप, बोतल, कुर्सी र अन्य प्लास्टिक सामग्री उत्पादन प्रभावित भएको छ। भारत र खाडी मुलुकबाट आउने कच्चा पदार्थको ढुवानी अवरुद्ध हुँदा उद्योग संकटमा छन्।कच्चा पदार्थ अभाव र मूल्यवृद्धि भएसँगै उत्पादन लागत बढ्दै, उपभोक्तामा मूल्य वृद्धि र दैनिक उपभोग्य वस्तुमा अभावको अवस्था सिर्जना भएको छ। उद्योगीका अनुसार युद्ध लम्बिए उपभोक्ताको दैनिक जीवन गाह्रो हुने निश्चित छ।