याम्बालिङ्ग हाइड्रोको स्थानीय आईपीओमा आवेदन म्याद वैशाख ७ सम्म, ७ लाख कित्ता अझै खुला

काठमाडौं । याम्बालिङ्ग हाइड्रोपावर लिमिटेड ले आयोजना प्रभावित क्षेत्रका स्थानीय बासिन्दाका लागि निष्काशन गरेको प्राथमिक सेयर (आईपीओ) को आवेदन अवधि लम्ब्याएको छ। कम्पनीले मागअनुसार आवेदन नपरेपछि उक्त आईपीओ अब वैशाख ७ गतेसम्म खुला रहने जनाएको छ।कम्पनीले जारी पूँजीको १० प्रतिशत बराबर ७ लाख कित्ता साधारण शेयर सिन्धुपाल्चोक जिल्लाको जुगल गाउँपालिकाका वडा नं. १ देखि ७ सम्मका स्थानीय बासिन्दाका लागि निष्काशन गरेको हो। प्रति सेयर १०० रुपैयाँ अंकित दर रहेको उक्त आईपीओमा न्यूनतम १० कित्ता र अधिकतम ७ हजार कित्तासम्म आवेदन दिन सकिने व्यवस्था गरिएको छ।कम्पनीका अनुसार तोकिएको अवधिभित्र आवश्यक आवेदन नपरेको कारण निष्काशन अवधि थप गरिएको हो। यद्यपि, पूर्ण रूपमा आवेदन प्राप्त भएमा वैशाख ७ अगावै पनि निष्काशन बन्द गर्न सकिने उल्लेख गरिएको छ।७.२७ मेगावाट क्षमताको याम्बालिङ्ग जलविद्युत आयोजनाको कुल लागत करिब १ अर्ब ८७ करोड रुपैयाँ रहेको छ। प्रतिमेगावाट लागत करिब २५ करोड रुपैयाँ रहेको आयोजनाको उत्पादन अनुमतिपत्र अझै २५ वर्षभन्दा बढी अवधि बाँकी रहेको छ।आईपीओ निष्काशन तथा बिक्री प्रबन्धकको रूपमा Muktinath Capital Limited रहेको छ। स्थानीय बासिन्दाले तोकिएका बैंक तथा संकलन केन्द्रहरूबाट आवेदन दिन सक्नेछन् भने आवश्यक परेमा आस्बा प्रणालीमार्फत पनि आवेदन दिन सकिने व्यवस्था गरिएको छ।