कालिन्चोक हाइड्रोपावर लिमिटेडको सर्वसाधारणका लागि निष्काशन गरेको आईपीओमा आवेदन दिने आज अन्तिम दिन

कालिन्चोक हाइड्रोपावर लिमिटेडले सर्वसाधारणका लागि निष्काशन गरेको आईपीओमा आवेदन दिने आज (चैत २५ गते) अन्तिम दिन रहेको छ । यसअघि कम्पनीले आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीहरूका लागि छुट्याइएको शेयर बाँडफाँट गरिसकेको छ। कम्पनीले जारी पूँजी ५५ करोड रुपैयाँको २५ प्रतिशत अर्थात १३ करोड ७५ लाख रुपैयाँ बराबरको १३ लाख ७५ हजार कित्ता शेयर निष्काशन गर्न अनुमति पाएकोमा हाल दोस्रो चरणमा सर्वसाधारणका लागि ६ लाख ८४ हजार ७५० कित्ता शेयर खुला गरेको हो, जसको अंकित मूल्य प्रतिकित्ता १०० रुपैयाँ रहेको छ। यसमध्ये केही हिस्सा सामूहिक लगानी कोष र कर्मचारीका लागि सुरक्षित राखिएको छ। लगानीकर्ताले न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन्। केयर रेटिङ्ग नेपालले कम्पनीलाई ‘केयरएनपी डबल बी’ रेटिङ्ग प्रदान गरेको छ, जसले औसत जोखिम रहेको संकेत गर्दछ। कम्पनीले सञ्चालन गरेको ५ मेगावाट क्षमताको साँगु (सोरुन) खोला जलविद्युत आयोजनाको कुल लागत १ अर्ब २० करोड रुपैयाँ रहेको छ। आईपीओको निष्काशन तथा बिक्री प्रबन्धक RBB Merchant Banking Limited रहेको छ भने लगानीकर्ताले सी-आस्बा प्रणाली वा Mero Share मार्फत आवेदन दिन सक्नेछन्।