सुन र चाँदीको मूल्यमा वृद्धि, नेपाली बजारमा दुवै धातु महँगिए

फागुन २६ गते मंगलबार नेपाली बजारमा सुन र चाँदी दुवैको मूल्यमा उल्लेखनीय वृद्धि देखिएको छ। नेपाल सुनचाँदी व्यवसायी संघका अनुसार यस दिन सुनको मूल्य प्रतितोला ३ हजार ८०० रुपैयाँले बढेर ३ लाख १७ हजार रुपैयाँ पुगेको छ। अघिल्लो दिन अर्थात सोमबार सुन प्रतितोला ३ लाख १३ हजार २०० रुपैयाँमा कारोबार भएको थियो। अन्तर्राष्ट्रिय बजारमा देखिएको मूल्य वृद्धिको प्रभाव स्थानीय बजारमा पनि परेकाले सुनको मूल्य बढेको व्यवसायीहरू बताउँछन्।यसैगरी, चाँदीको मूल्यमा पनि वृद्धि भएको छ। मंगलबार चाँदी प्रतितोला ३१० रुपैयाँले बढेर ५ हजार ७२० रुपैयाँमा कारोबार भइरहेको छ। सोमबार चाँदीको मूल्य प्रतितोला ५ हजार ४१० रुपैयाँ रहेको थियो। पछिल्लो समय अन्तर्राष्ट्रिय बजारमा देखिएको उतार–चढावसँगै नेपाली बजारमा पनि सुन–चाँदीको मूल्यमा निरन्तर परिवर्तन देखिँदै आएको छ।