राष्ट्र बैंकद्वारा सात महिनामा ३१५ खर्बभन्दा बढी तरलता प्रशोचन

काठमाडौं । चालु आर्थिक वर्ष २०८२/८३ को पहिलो सात महिनामा नेपाल राष्ट्र बैंकले मौद्रिक व्यवस्थापनका विभिन्न उपकरण प्रयोग गर्दै ठूलो परिमाणमा बैंकिङ प्रणालीबाट तरलता प्रशोचन गरेको छ। राष्ट्र बैंकका अनुसार समीक्षा अवधिमा कारोबारमा आधारित कुल ३१५ खर्ब ८६ अर्ब ८५ करोड रुपैयाँ बराबरको खुद तरलता प्रशोचन गरिएको छ।राष्ट्र बैंकले सार्वजनिक गरेको विवरणअनुसार निक्षेप संकलन बोलकबोलमार्फत १६ खर्ब ६ अर्ब ९५ करोड रुपैयाँ, स्थायी निक्षेप सुविधामार्फत २९७ खर्ब ९२ अर्ब ४० करोड रुपैयाँ र राष्ट्र बैंक ऋणपत्रमार्फत २ खर्ब रुपैयाँ गरी कुल ३१५ खर्ब ९९ अर्ब ३५ करोड रुपैयाँ बराबरको तरलता प्रशोचन गरिएको हो। यसै अवधिमा ओभरनाइट तरलता सुविधामार्फत १२ अर्ब ५० करोड रुपैयाँ प्रवाह गरिएको छ। यी सबै कारोबार समायोजन गर्दा बैंकिङ प्रणालीबाट खुद ३१५ खर्ब ८६ अर्ब ८५ करोड रुपैयाँ तरलता प्रशोचन भएको राष्ट्र बैंकले जनाएको छ।गत आर्थिक वर्षको सोही अवधिमा भने मौद्रिक व्यवस्थापनका उपकरणमार्फत १४८ खर्ब ५८ अर्ब ६५ करोड रुपैयाँ मात्र तरलता प्रशोचन गरिएको थियो, जसको तुलनामा चालु वर्षमा तरलता व्यवस्थापन उल्लेख्य रूपमा बढेको देखिन्छ।यसैबीच राष्ट्र बैंकले विदेशी विनिमय बजारमा हस्तक्षेप गर्दै ३ अर्ब ९६ करोड अमेरिकी डलर खुद खरिद गरी ५ खर्ब ६४ अर्ब ४ करोड रुपैयाँ बराबरको तरलता बजारमा प्रवाह गरेको छ। अघिल्लो वर्ष सोही अवधिमा २ अर्ब ८७ करोड डलर खरिद गरी ३ खर्ब ८७ अर्ब ५६ करोड रुपैयाँ बराबरको तरलता प्रवाह गरिएको थियो।त्यस्तै, समीक्षा अवधिमा राष्ट्र बैंकले २ अर्ब २६ करोड अमेरिकी डलर बिक्री गरी ३ खर्ब २१ अर्ब ९६ करोड रुपैयाँ बराबरको भारतीय रुपैयाँ खरिद गरेको जनाएको छ। अघिल्लो वर्ष सोही अवधिमा २ अर्ब २४ करोड डलर बिक्री गरी ३ खर्ब ३ अर्ब ७० करोड रुपैयाँ बराबरको भारतीय रुपैयाँ खरिद गरिएको थियो।यस अवधिमा अन्तरबैंक कारोबारमा भने गिरावट देखिएको छ। वाणिज्य बैंकहरूबीच ५ खर्ब ५९ अर्ब ८६ करोड रुपैयाँ र अन्य वित्तीय संस्थाहरूबीच ७६ अर्ब ३६ करोड रुपैयाँ गरी कुल ६ खर्ब ३६ अर्ब २२ करोड रुपैयाँ अन्तरबैंक कारोबार भएको छ। अघिल्लो वर्ष सोही अवधिमा भने वाणिज्य बैंकहरूबीच ९ खर्ब ३७ अर्ब ८१ करोड रुपैयाँ र अन्य वित्तीय संस्थाहरूबीच १ खर्ब २ अर्ब २० करोड रुपैयाँ गरी कुल १० खर्ब ४० अर्ब १ करोड रुपैयाँ अन्तरबैंक कारोबार भएको थियो।