सरकारले ६ महिनामा ६ खर्ब ९० अर्ब खर्च गर्‍यो, पुँजीगत खर्च कमजोर

सरकारले चालु आर्थिक वर्ष २०८२/८३ को पहिलो छ महिनामा कुल बजेटमध्ये ६ खर्ब ९० अर्ब २१ करोड रुपैयाँ खर्च गरेको छ। अर्थमन्त्रालयले सार्वजनिक गरेको अर्धवार्षिक समीक्षा अनुसार कुल १९ खर्ब ६४ अर्ब ११ करोड बजेटमध्ये पुस मसान्तसम्म उक्त रकम खर्च भएको हो।

विनियोजित बजेटमध्ये चालु खर्च ४१.२५ प्रतिशत, पुँजीगत खर्च १२.१२ प्रतिशत र वित्तीय व्यवस्थातर्फ ४०.१५ प्रतिशत खर्च भएको छ। समग्र खर्च गत वर्षको तुलनामा ३.३९ प्रतिशतले वृद्धि भएको भए पनि पुँजीगत खर्च अपेक्षाकृत कम देखिएको छ। पूर्वतयारीको अभाव, जग्गा प्राप्ति र वन क्षेत्रको स्वीकृतिमा जटिलता तथा आन्दोलनका कारण भएको क्षतिले पुँजीगत खर्चमा असर परेको मन्त्रालयले जनाएको छ।

चालु आर्थिक वर्षमा पूर्वतयारी नभएका तथा अनुत्पादक साना आयोजनामा विनियोजित १ खर्ब १९ अर्ब ५३ करोड रुपैयाँ बजेट स्थगन गरिएको छ। यसमध्ये आवश्यक ठहर भएका आयोजनाका लागि ४२ अर्ब २८ करोड रुपैयाँ फुकुवा गरिएको अर्थमन्त्री रामेश्वर खनालले जानकारी दिए।

राजस्व परिचालनतर्फ यस वर्ष कुल १४ खर्ब ८० अर्ब रुपैयाँ संकलन गर्ने लक्ष्य राखिएको छ। पुस मसान्तसम्म ७ खर्ब ११ अर्ब लक्ष्यको तुलनामा ५ खर्ब ५ अर्ब ४० करोड रुपैयाँ संकलन भएको छ, जुन गत वर्षको सोही अवधिको तुलनामा २.४७ प्रतिशतले बढी हो।

आन्तरिक ऋणतर्फ वार्षिक ३ खर्ब ६२ अर्ब परिचालन गर्ने लक्ष्य रहेकामा हालसम्म १ खर्ब ७७ अर्ब रुपैयाँ संकलन भएको छ। त्यस्तै, सार्वजनिक ऋणको साँवा–व्याज भुक्तानीतर्फ १ खर्ब ८७ अर्ब रुपैयाँ भुक्तानी भइसकेको छ।

समीक्षा अवधिमा ६५ अर्ब ३९ करोड रुपैयाँ बराबरको वैदेशिक सहायता प्रतिवद्धता प्राप्त भएको छ, जसमा २९.४४ प्रतिशत अनुदान र ७०.५६ प्रतिशत ऋण रहेको छ। अर्थमन्त्रालयले पुनः प्राथमिकीकरण, मितव्ययिता र अनुत्पादक खर्च कटौतीमा जोड दिँदै भत्ता तथा अनावश्यक खर्चमा रोक लगाउने नीति लिएको जनाएको छ।