नागरिक एपबाट सरकारी सेवाहरू उपलब्ध गराउने तयारी अन्तिम चरणमा, डिजिटल सुशासन सुदृढ हुने

सरकारले डिजिटल सुशासनलाई सुदृढ बनाउने उद्देश्यसहित नागरिक सेवाहरूलाई अनलाइनमार्फत उपलब्ध गराउने अभियानलाई तीव्र बनाएको छ । सञ्चार तथा सूचना प्रविधि मन्त्रालयका अनुसार निजामती कर्मचारीको व्यक्तिगत विवरण, लोक सेवा आयोगका परीक्षार्थीको प्रवेशपत्र तथा वैदेशिक अध्ययनका लागि आवश्यक नो अब्जेक्सन सर्टिफिकेट (एनओसी) अब नागरिक एपबाटै उपलब्ध गराउने तयारी अन्तिम चरणमा पुगेको छ । सूचना प्रविधि विभागका अनुसार हाल प्रणाली परीक्षणको चरणमा रहेको र एक हप्ताभित्र पूर्ण रूपमा कार्यान्वयनमा आउने अपेक्षा गरिएको छ। साथै, नेपाल इन्जिनियरिङ परिषद्सँगको सहकार्यमा इन्जिनियरहरूको प्रमाणपत्र पनि एपमार्फत उपलब्ध गराउने प्रक्रिया अघि बढाइएको छ । यसअघि नै प्रहरी चारित्रिक प्रमाणपत्र सेवा सञ्चालनमा आइसकेको छ, जसले नागरिक एपलाई ‘वन–स्टप डिजिटल सेवा प्लेटफर्म’ बनाउने सरकारको योजनालाई थप बल पुगेको छ ।