आइजीआई प्रुडेन्सियल इन्स्योरेन्सको ९४ हजार बढी संस्थापक शेयर लिलामीमार्फत बिक्रीमा

काठमाडौं — आइजीआई प्रुडेन्सियल इन्स्योरेन्स लिमिटेडका संस्थापक समूहअन्तर्गत रहेका ९४ हजार ७९७ कित्ता शेयर लिलामी प्रक्रियामार्फत बिक्रीमा ल्याइएको छ। कम्पनीले एक सूचना जारी गर्दै प्रति शेयर न्यूनतम २४० रुपैयाँ तोकी इच्छुक व्यक्ति, कम्पनी तथा संस्थाहरूलाई गोप्य शिलबन्दी बोलपत्रमार्फत आवेदन दिन आह्वान गरेको हो।सूचना अनुसार बोलपत्र पेश गर्ने प्रक्रिया चैत १८ गतेबाट सुरु भइसकेको छ भने चैत २५ गतेसम्म आवेदन दिन सकिनेछ। इच्छुक लगानीकर्ताले आफूले खरिद गर्न चाहेको शेयरको दर उल्लेख गर्दै रिलायबल इन्भेष्टमेन्ट एण्ड मर्चेन्ट क्यापिटल लिमिटेड, बालुवाटारमा आवेदन पेश गर्नुपर्ने व्यवस्था गरिएको छ।कम्पनीले न्यूनतम मूल्यभन्दा कम दरमा आवेदन मान्य नहुने स्पष्ट पारेको छ। साथै आवेदन गर्दा सम्पूर्ण शेयर कित्ताका लागि बोलपत्र दिनुपर्नेछ र नियामक निकायले तोकेको अधिकतम सीमा ननाघ्ने गरी मात्रै आवेदन दिन पाइनेछ।बोलपत्र प्रक्रियामा सहभागी हुन चाहने लगानीकर्ताले आफूले माग गरेको शेयर बराबरको रकम ‘गुड फर पेमेन्ट चेक’मार्फत धरौटी राख्नुपर्नेछ। छनोटमा नपरेका आवेदकको रकम भने आईपीएसमार्फत फिर्ता गरिने कम्पनीले जनाएको छ।शेयर बाँडफाँड गर्दा पहिलो प्राथमिकता हालका संस्थापक शेयरधनीलाई दिइनेछ भने बाँकी शेयर उच्च दर प्रस्ताव गर्ने योग्य आवेदकलाई वितरण गरिने व्यवस्था गरिएको छ। साथै, अन्तिम स्वीकृति सम्बन्धित कम्पनीको सञ्चालक समितिबाट हुने र आवश्यक परे नियामक निकायको स्वीकृति समेत लिनुपर्नेछ।आवेदन खोल्ने प्रक्रिया चैत २६ गते बिहान ११ बजे हुने तय गरिएको छ। यस लिलामी प्रक्रियाले बीमा क्षेत्रमा लगानीकर्ताहरूका लागि नयाँ अवसर सिर्जना गरेको विश्लेषण गरिएको छ।