छ महिनामा झन्डै ५ सय मेगावाट विद्युत् थप, जडित क्षमता ४ हजार ८६ मेगावाट पुग्यो

काठमाडौं — पछिल्ला छ महिनाको अवधिमा नेपालले झन्डै पाँच सय मेगावाट विद्युत् राष्ट्रिय प्रसारण प्रणालीमा थप गरेको छ। ऊर्जा, जलस्रोत तथा सिँचाइ मन्त्रालयका अनुसार पुस मसान्तसम्म राष्ट्रिय ग्रिडमा ४९५ मेगावाट विद्युत् जोडिँदा देशको कुल जडित क्षमता ४ हजार ८६ मेगावाट पुगेको छ।

मन्त्रालयका विवरणअनुसार गत असार मसान्तसम्म देशको जडित क्षमता ३ हजार ५९१ मेगावाट थियो। त्यसपछि असोज मसान्तमा बढेर ४ हजार ४६ मेगावाट पुगेको क्षमता पुससम्म थप विस्तार भएको हो। परीक्षण चरणमा रहेका आयोजना तथा वैकल्पिक ऊर्जाबाट उत्पादन भएको विद्युत् भने यस तथ्यांकमा समावेश गरिएको छैन।

उत्पादन क्षमता उल्लेख्य रूपमा बढे पनि हिउँदयाम सुरु भएसँगै नदीको बहाव घट्दा नेपालले हाल भारतबाट विद्युत् आयात गर्नुपर्ने अवस्था कायम छ। मन्त्रालयका अनुसार हाल सौर्य ऊर्जाबाट ६२.७ मेगावाट र लघु तथा साना जलविद्युत् आयोजनाबाट ४१.१६ मेगावाट विद्युत् उत्पादन भइरहेको छ।

उत्पादनसँगै प्रसारण पूर्वाधार पनि विस्तार हुँदै गएको मन्त्रालयले जनाएको छ। हाल ६६ केभीभन्दा माथिका प्रसारण लाइनको कुल लम्बाइ ७ हजार २४७ सर्किट किलोमिटर पुगेको छ। यसअन्तर्गत १४ हजार १२३ एमभिए क्षमताका सबस्टेसन निर्माण भइसकेका छन्। यस्तै, ३३ केभी प्रसारण लाइनको लम्बाइ ८ हजार २१९ सर्किट किलोमिटर पुगेको छ भने ३ हजार एमभिए क्षमताका सबस्टेसन सञ्चालनमा छन्।

प्रतिवेदनअनुसार हाल विद्युत् चुहावट १२.७३ प्रतिशतमा झरेको छ। प्रतिव्यक्ति विद्युत् खपत ४५० युनिट पुगेको छ। समीक्षा अवधिमा नेपालले २ हजार ७७४ गिगावाट घण्टा विद्युत् निर्यात गर्दा १ सय २३ गिगावाट घण्टा विद्युत् आयात गरेको तथ्यांक सार्वजनिक गरिएको छ।

उत्पादन र पूर्वाधार दुवै क्षेत्रमा प्रगति देखिए पनि मौसमी असन्तुलनका कारण हिउँदमा आयात र वर्षायाममा निर्यातको चक्र भने अझै कायमै रहेको ऊर्जा क्षेत्रका जानकारहरूको भनाइ छ। उनीहरूका अनुसार दीर्घकालीन ऊर्जा व्यवस्थापनका लागि भण्डारण आयोजना, वैकल्पिक ऊर्जा र आन्तरिक खपत वृद्धि गर्न विशेष ध्यान दिन आवश्यक रहेको छ।