नेपाल राष्ट्र बैंक ले निर्देशित कर्जा सीमा ४०% बाट घटाएर ३०% मा झार्यो

काठमाडौं । बैंक तथा वित्तीय संस्थाहरूका लागि निर्देशित कर्जाको सीमा घटाइएको छ। अब बैंकहरूले कुल कर्जाको न्यूनतम ३० प्रतिशत मात्रै निर्देशित क्षेत्रमा प्रवाह गरे पुग्ने व्यवस्था गरिएको छ, जुन यसअघि ४० प्रतिशत थियो। नेपाल राष्ट्र बैंक ले जारी गरेको संशोधित एकीकृत निर्देशनअनुसार कृषि क्षेत्रमा कर्जा प्रवाहको सीमा १५ प्रतिशतबाट घटाएर १० प्रतिशत बनाइएको छ, जुन २०८३ पुसदेखि लागू हुनेछ। साथै, ऊर्जा, पर्यटन, सूचना प्रविधि, एमएसएमई र स्वदेशी कच्चा पदार्थमा आधारित उद्योगहरूमा कुल २० प्रतिशत कर्जा प्रवाह गर्नुपर्ने व्यवस्था गरिएको छ। कृषि क्षेत्रमा तोकिएको न्यूनतमभन्दा बढी कर्जा प्रवाह गरेको अवस्थामा अन्य क्षेत्रमा अपुग भएको कर्जामा समायोजन गर्न सकिने छुट पनि दिइएको छ। यसैगरी, विकास बैंकका लागि २० प्रतिशत र फाइनान्स कम्पनीका लागि १५ प्रतिशत निर्देशित कर्जा प्रवाहको सीमा तोकिएको छ।