नेप्सेमा गहिरो झट्का: सपोर्ट भत्किँदा बजार ओरालो, विश्वास संकट गहिरिँदै

काठमाडौं । नेपाल स्टक एक्सचेन्ज (नेप्से) परिसूचकमा बुधबार देखिएको तीव्र गिरावटले बजारलाई गहिरो दबाबमा धकेलेको छ। परिसूचक ७४.७३ अंकले घटेर २७७६.३६ विन्दुमा झरेपछि लगानीकर्तामा त्रास झन् बढेको देखिएको छ। मंगलबारको सामान्य सुधार टिक्न नसक्नुले बजारको आधार कमजोर रहेको स्पष्ट संकेत दिएको छ। छोटो अवधिमा देखिएको उकालो पूर्ण रूपमा असफल हुँदा बजार फेरि ओरालो यात्रामा फर्किएको देखिन्छ।यस गिरावटको विशेषता के रह्यो भने बजारका सबै १३ वटै उपसमूह एकैदिन राताम्मे भए। ‘अन्य’ उपसमूह सबैभन्दा धेरै ५ प्रतिशतभन्दा बढीले घट्दा विकास बैंक, वित्त र व्यापार समूह पनि ३ प्रतिशतभन्दा बढीले ओरालो लागे। बैंकिङ, जलविद्युत, बीमा, होटल तथा पर्यटन र लगानी समूहहरूमा समेत २ प्रतिशतभन्दा बढीको गिरावट देखिनुले बजारको कमजोरी कुनै एक क्षेत्रमा सीमित नभई समग्र संरचनामै फैलिएको देखिन्छ।बजारमा आएको यो झट्काको मूल कारण पछिल्ला दिनहरूमा तीव्र बनेको अनुसन्धानलाई मानिएको छ। विशेषगरी दिपक भट्ट सम्बन्धी प्रकरणले लगानीकर्तामा मनोवैज्ञानिक दबाब बढाएको छ। ठूलो रकमको प्रयोग, सम्भावित अनियमितता र ‘ब्ल्याक मनी’ सम्बन्धी आशंकाले बजारमा असहजता थपेको छ। एउटा घटनाले समग्र बजारलाई प्रभावित पार्ने अवस्था सिर्जना हुँदा “लहरो तान्दा पहरो गज्रियो” जस्तो परिस्थिति देखिएको विश्लेषकहरू बताउँछन्।कारोबारको सुरुवातदेखि नै बिक्री दबाब हाबी देखिएको थियो। बजार खुल्नेबित्तिकै सूचक ओरालो लाग्न थालेको र दिनभर कुनै पनि चरणमा सुधारको संकेत नदेखिनुले लगानीकर्ताको आत्मविश्वास कमजोर भएको प्रष्ट हुन्छ। प्राविधिक रूपमा महत्वपूर्ण मानिएको करिब २७८८ को सपोर्ट स्तरसमेत जोगिन नसक्दा बजारले आफ्नो आधार गुमाएको संकेत दिएको छ।प्राविधिक विश्लेषणका आधारमा हेर्दा यो गिरावट सामान्य करेक्सनभन्दा फरक देखिएको छ। लामो समयदेखि बनिरहेको ‘Higher Low’ संरचना भत्किएको छ भने अपट्रेन्ड लाइनसमेत ब्रेक भएको छ। यसले बजारको ट्रेन्ड परिवर्तनतर्फ संकेत गर्छ। अहिलेको अवस्थामा पहिले सपोर्ट रहेको क्षेत्र अब रेजिस्टेन्समा परिणत हुने सम्भावना बलियो देखिएको छ।कारोबार रकम भने उल्लेखनीय रूपमा घटेको छैन। बुधबार १२ अर्बभन्दा बढीको कारोबार हुनु भनेको बजारमा सक्रियता कायम रहेको संकेत हो। तर यो सक्रियता खरिदभन्दा बढी बिक्रीमा केन्द्रित देखिन्छ। उच्च कारोबारसँगै गिरावट आउनु सामान्यतया ‘distribution phase’ को संकेत मानिन्छ, जहाँ ठूला लगानीकर्ताहरू क्रमशः बजारबाट बाहिरिँदै गरेका हुन्छन्।बीमा क्षेत्र विशेषगरी दबाबमा परेको देखिएको छ। नेपाल पुनर्बीमा कम्पनी लिमिटेड को शेयर मूल्य करिब १० प्रतिशतले घट्नुले यस क्षेत्रमा लगानीकर्ताको विश्वास कमजोर भएको संकेत दिन्छ। त्यस्तै हिमालयन रि इन्स्योरेन्स कम्पनी लिमिटेड मा उच्च कारोबार हुनु पनि ध्यानाकर्षण गर्ने विषय बनेको छ, जसले सो कम्पनीमा लगानीकर्ताको उच्च चासो र दबाब दुवै देखाउँछ।आज बनेको क्यान्डल प्राविधिक रूपमा ‘बेयरिस ब्रेकडाउन क्यान्डल’ को रूपमा देखिएको छ। लामो रातो क्यान्डल, सपोर्ट ब्रेक र दिनकै न्यून बिन्दु नजिक क्लोज हुनु—यी सबै संकेतहरूले बजारमा बिक्रीकर्ताको पूर्ण वर्चस्व रहेको देखाउँछ। यस्तो क्यान्डलले प्रायः आगामी दिनमा पनि दबाब कायम रहने सम्भावना जनाउँछ।अब बजारका लागि तल्लो सपोर्ट क्षेत्रहरू करिब २६००, २५६८ र २५३० तर्फ देखिएका छन्। यदि हालको दबाब जारी रह्यो भने बजारले यी स्तरहरू परीक्षण गर्न सक्छ। उता माथिल्लो स्तरमा २९०० माथिको दायरा तत्काल पार गर्न बजारलाई निकै बलियो मोमेन्टम आवश्यक पर्ने देखिन्छ, जुन अहिलेको अवस्थामा कठिन देखिन्छ।समग्रमा हेर्दा बजार अहिले विश्वासको संकटबाट गुज्रिरहेको छ। अनुसन्धान, प्राविधिक कमजोरी र मनोवैज्ञानिक दबाब—तीनै पक्षले बजारलाई एकैचोटि असर पारेका छन्। यस्तो अवस्थामा लगानीकर्ताका लागि जोखिम उच्च रहेको छ। अब बजार स्थिर हुन पारदर्शी वातावरण, स्पष्ट नीतिगत दिशा र ठूला लगानीकर्ताको पुनः सहभागिता आवश्यक देखिन्छ। तबसम्म बजारमा उतारचढाव उच्च नै रहने अनुमान गरिएको छ।