क्लाउड एआईमा नयाँ फिचर: अब चार्ट र डायग्राममार्फत जटिल विषय बुझाउन सक्ने

कृत्रिम बुद्धिमत्ता कम्पनी एन्थ्रोपिकले आफ्नो एआई च्याटबोट क्लाउड (Claude) मा नयाँ फिचर थपेको छ, जसले अब प्रयोगकर्तालाई चार्ट र डायग्राम प्रयोग गरेर जटिल अवधारणाहरू सजिलै बुझाउन सक्ने बनाएको छ। कम्पनीले यो सुविधा हाल परीक्षण अर्थात् बीटा संस्करणका रूपमा सार्वजनिक गरेको जनाएको छ।नयाँ अपडेटसँगै क्लाउडले अब केवल टेक्स्टमा आधारित उत्तर मात्र नदिई आवश्यक परेमा भिजुअल सामग्री पनि देखाएर जानकारी दिन सक्नेछ। प्रयोगकर्ताले सिधै चार्ट वा चित्र बनाउन अनुरोध गर्न सक्छन्, वा क्लाउडले कुनै विषय स्पष्ट पार्न दृश्य सामग्री उपयोगी ठानेमा आफैं पनि चार्ट वा डायग्राम तयार पारेर देखाउन सक्छ।कम्पनीका अनुसार यो फिचर विशेषगरी जटिल प्रक्रिया वा अवधारणा बुझाउन उपयोगी हुनेछ। उदाहरणका लागि, प्रयोगकर्ताले कागजको विमान कसरी बनाउने भन्ने प्रश्न गरेमा क्लाउडले चरणबद्ध रूपमा डायग्रामसहित कागज कसरी फोल्ड गर्ने भन्ने प्रक्रिया देखाउन सक्छ। यसले प्रयोगकर्तालाई केवल वर्णन पढेर मात्र नभई चित्र हेरेर पनि सजिलै बुझ्न सहयोग गर्नेछ।एन्थ्रोपिकले स्पष्ट पारेको छ कि यो सुविधा इमेज जेनेरेशन प्रणाली भने होइन। यसको सट्टा क्लाउडले HTML कोड र XML आधारित भेक्टर ग्राफिक्स प्रयोग गरेर चार्ट र डायग्राम तयार गर्छ। कम्पनीका अनुसार यसले क्लाउडलाई आफ्नै डिजिटल ह्वाइटबोर्ड प्रयोग गर्न सक्ने क्षमता दिएको जस्तै अनुभव प्रदान गर्छ।यो नयाँ सुविधा क्लाउडका सबै प्रयोगकर्ताका लागि उपलब्ध हुनेछ, चाहे उनीहरूले सशुल्क सदस्यता लिएका हुन् वा नलिएका। तर कम्पनीले यो सुविधा अझै बीटा चरणमा भएकाले कहिलेकाहीँ त्रुटि वा अनियमितता देखिन सक्ने चेतावनी पनि दिएको छ। हालका लागि भने यो सुविधा मोबाइल संस्करणमा उपलब्ध छैन।यसअघि केही दिनअघि मात्रै ओपनएआईले च्याटजिपिटीमा विज्ञान र गणितका विषयहरू बुझाउन इन्टरएक्टिभ भिजुअल सामग्री प्रयोग गर्न सक्ने क्षमता थपेको थियो। त्यसपछि एन्थ्रोपिकले पनि क्लाउडमा यस्तो फिचर ल्याएसँगै एआई कम्पनीहरूबीच प्रयोगकर्तालाई जटिल विषयहरू सहज तरिकाले बुझाउने नयाँ–नयाँ प्रविधि विकास गर्ने प्रतिस्पर्धा तीव्र हुँदै गएको देखिन्छ।