कोशी प्रदेशको लगानी सम्मेलन वैशाख १८ र १९ गते सर्‍यो

कोशी प्रदेश सरकारले आगामी माघ ११, १२ र १३ गते गर्ने भनिएको लगानी सम्मेलन सारेर अब वैशाख १८ र १९ गते गर्ने निर्णय गरेको छ। बिहीबार बसेको मन्त्रिपरिषद्को बैठकले पर्याप्त तयारी नभएको कारण सम्मेलन सार्ने निर्णय गरेको हो।

यसअघि, विपक्षी दल नेकपा माओवादी केन्द्रले सम्मेलनको तयारीमा कमजोरी भएको भन्दै आलोचना गर्दै आएको थियो। त्यस्तै, निजी क्षेत्रका उद्योगी–व्यवसायीसँग सम्मेलन कहाँ र कसरी गर्ने भन्ने विषयमा विवाद भइरहेकाले सम्मेलन स्थगित गरिएको प्रदेश सरकारका अधिकारीहरूले जनाएका छन्।

यसैगरी, बिहीबारको बैठकले मुख्य न्यायाधिवक्ताको काम, कर्तव्य, अधिकार र सेवाका अन्य सर्त सम्बन्धी ऐन २०७५ लाई संशोधन गर्न बनेको विधेयक, जीवनाशक विषादी व्यवस्थापन सम्बन्धी विधेयक, र बिउ बिजन व्यवस्थापन गर्न बनेको विधेयक प्रदेशसभामा पेश गर्ने निर्णय गरेको छ।

त्यस्तै, आमसञ्चार सम्बन्धी विधेयकलाई कानुन, न्याय तथा प्रदेश मामिला समितिमा छलफल गरी पेश गर्ने निर्णय भएको छ। सरकारका प्रवक्ता तथा आन्तरिक मामिला तथा कानून मन्त्री रेवतीरमण भण्डारीले यी निर्णयहरूबारे जानकारी दिएका छन्।