मौद्रिक स्थिति : मुद्राप्रदायमा उल्लेख्य वृद्धि

चालु आर्थिक वर्ष २०८१/८२ मा देशको मौद्रिक स्थितिमा उल्लेख्य सुधार देखिएको छ। नेपाल राष्ट्र बैंकले सार्वजनिक गरेको तथ्यांक अनुसार विस्तृत मुद्राप्रदाय १२.५ प्रतिशतले बढेको छ। यो अघिल्लो वर्षको १२.९ प्रतिशत वृद्धिदर भन्दा अलिक कम भए पनि स्थिर प्रवृत्ति देखिएको छ।

समीक्षा अवधिमा खुद वैदेशिक सम्पत्ति (विदेशी विनिमय मूल्याङ्कन नाफा नोक्सान समायोजनसहित) रु. ५९४ अर्ब ५४ करोडले बढेको छ। गत वर्ष सो सम्पत्ति रु. ५०२ अर्ब ४९ करोडले मात्र बढेको थियो। यसले विदेशी मुद्राको सञ्चिति र देशको बाह्य क्षेत्रमा स्थायित्व देखाउँछ।

त्यस्तै, सञ्चित मुद्रा समेत उल्लेख्य रूपमा बढेको छ। चालु वर्षमा सञ्चित मुद्रा १६.१ प्रतिशतले बढ्दा अघिल्लो वर्षमा यो वृद्धि ७.७ प्रतिशत मात्र थियो। यो बैंकिङ प्रणालीभित्र तरलता सहज भएको सूचकका रूपमा लिइएको छ।

राष्ट्र बैंकको विश्लेषण अनुसार पछिल्ला पाँच वर्षको प्रवृत्तिमा मुद्राप्रदाय र सञ्चित मुद्रामा उतारचढाव देखिए पनि हालको वृद्धिदरले मौद्रिक स्थायित्वतर्फ सकारात्मक संकेत दिएको छ।