नेप्से २,८०० विन्दु पार गर्दै बढ्यो, कारोबारमा वृद्धि

काठमाडौं – नेपाल स्टक एक्सचेञ्ज (नेप्से) परिसूचक बुधबार बढेर बन्द भएको छ, मंगलबारको सामान्य गिरावटपछि बजारमा सुधार आएको छ। नेप्से परिसूचक ४५.१२ अंक बढेर २,८०२.५२ विन्दुमा पुगेको छ र २,८०० विन्दुको सीमा पार गरेको छ। यसैगरी, सेन्सेटिभ इन्डेक्स ५.७५ अंक, फ्लोट इन्डेक्स २.८९ अंक र सेन्सेटिभ फ्लोट इन्डेक्स २.१० अंकले बढेको छ।कारोबार रकममा पनि वृद्धि देखिएको छ । ३४६ कम्पनीमा ९८,१६२ पटकको कारोबारमा १ करोड ८८ लाख १६ हजार कित्ता शेयरको मूल्य ८ अर्ब ३१ करोड ८९ लाख ८ हजार रुपैयाँ पुगेको छ, जुन मंगलबारको ६ अर्ब ७३ करोड रुपैयाँको कारोबारभन्दा बढी हो। यस दिन सातवटा स्टक सकारात्मक सर्किट लेभलमा कारोबार भएको छ, जसमा रिलायन्स स्पिनिङ्ग मिल्स, श्रीनगर एग्रीटेक इन्डष्ट्रीज, सोलु हाइड्रोपावर, होटल फरेष्ट इन, सुपर खुदी हाइड्रोपावर, रिजलाइन इनर्जी र सूर्यकुण्ड हाइड्रो इलेक्ट्रिक समावेश छन्। साथै, सान्भि इनर्जीको शेयर मूल्य ९% भन्दा बढी बढेको छ भने बन्दीपुर केबलकार एण्ड टुरिजमको शेयर ८% भन्दा बढी बढेको छ। श्वेत गंगा हाइड्रोपावर एण्ड कन्स्ट्रक्सनको शेयर मूल्य ४.३५% ले घटेको छ।कारोबार रकमका आधारमा एसवाई प्यानल नेपाल शीर्ष स्थानमा रहेको छ, जसको ४६ करोड ८१ लाख रुपैयाँबराबरको शेयर कारोबार भएको छ । त्यसपछि रिलायन्स स्पिनिङ्ग मिल्सको ४२ करोड रुपैयाँभन्दा बढी र शिवम् सिमेन्ट्सको ३७ करोड रुपैयाँभन्दा बढीको कारोबार भएको छ । सबै १३ उपसमूहको परिसूचक बढेको छ। उत्पादन तथा प्रशोधन उपसमूहको परिसूचक सर्वाधिक ३.८७% ले बढेको छ। होटल तथा पर्यटन र जलविद्युत उपसमूह २.५% भन्दा बढीले बढेको छ भने बैंकिङ्ग, विकास बैंक, वित्त, लगानी, जीवन बीमा, लघुवित्त र निर्जीवन बीमा उपसमूह १% भन्दा बढीले बढेको छ।