सन नेपाल लाइफ इन्स्योरेन्सले हकप्रद निष्काशनका लागि बुक क्लोज मिति तय

सन नेपाल लाइफ इन्स्योरेन्स कम्पनीले हकप्रद शेयर निष्काशनका लागि बुक क्लोज मिति तय गरेको छ। कम्पनीले २०८२ वैशाख ५ गते बुक क्लोज गर्ने निर्णय गरेको छ। यसअनुसार, वैशाख ४ गतेसम्म कायम शेयरधनीहरूले मात्र हकप्रद शेयर भर्न पाउनेछन्।

कम्पनीले नेपाल धितोपत्र बोर्डबाट चैत ३ गते हकप्रद निष्काशनको अनुमति प्राप्त गरेको थियो। अब कम्पनीले आफ्नो चुक्ता पुँजीको २७ प्रतिशत बराबरको हकप्रद शेयर निष्काशन गर्नेछ। जसअनुसार, १ अर्ब ६ करोड ९६ लाख ३२ हजार रुपैयाँ बराबरको १ करोड ६ लाख ९६ हजार कित्ता हकप्रद शेयर जारी हुनेछ।

नेपाल बीमा प्राधिकरणले जीवन बीमा कम्पनीहरूका लागि ५ अर्ब रुपैयाँ चुक्ता पुँजी पुर्‍याउनुपर्ने अनिवार्य व्यवस्था गरेको छ। सोही व्यवस्थालाई पालना गर्न कम्पनीले हकप्रद शेयरमार्फत पुँजी वृद्धि गर्न लागेको हो। यसले कम्पनीको वित्तीय आधारलाई थप सुदृढ बनाउने अपेक्षा गरिएको छ।