प्रधानमन्त्री बालेन र गभर्नर पौडेलबीच पहिलो भेट, बैंकिङ सुधारदेखि रेमिट्यान्ससम्म छलफल

काठमाडौं — नवनियुक्त प्रधानमन्त्री बालेन्द्र शाह (बालेन) र नेपाल राष्ट्र बैंकका गभर्नर डा. विश्व पौडेलबीच पहिलो शिष्टाचार भेटवार्ता सम्पन्न भएको छ। करिब एक घण्टा चलेको भेटमा बैंकिङ क्षेत्रको वर्तमान अवस्था, रेमिट्यान्स आप्रवाह, बाह्य क्षेत्रको दबाब र समग्र अर्थतन्त्रसँग जोडिएका महत्वपूर्ण विषयमा विस्तृत छलफल भएको जनाइएको छ।भेटका क्रममा प्रधानमन्त्री शाहले गभर्नरलाई कुनै पनि प्रकारको दबाब वा प्रभावमा नपरी स्वतन्त्र रूपमा काम गर्न स्पष्ट निर्देशन दिएका छन्। विशेषगरी ऋण दुरुपयोग तथा सम्पत्ति शुद्धीकरणमा संलग्न व्यक्तिहरूमाथि कडाइका साथ कारवाही गर्न राष्ट्र बैंक सक्रिय रहनुपर्नेमा प्रधानमन्त्रीले जोड दिएका थिए। पछिल्लो समय वित्तीय अनुशासन र पारदर्शिताको विषयमा सरकार गम्भीर रूपमा अघि बढेको संकेत यसबाट देखिएको छ।सरकारले अहिले सम्पत्ति शुद्धीकरण विभाग, केन्द्रीय अनुसन्धान ब्यूरो लगायतका निकायमार्फत वित्तीय अपराधमाथि अनुसन्धान तीव्र बनाइरहेको अवस्थामा राष्ट्र बैंकको भूमिका अझ महत्वपूर्ण बनेको छ। यस सन्दर्भमा नियामक निकायको सहकार्य, सूचना आदानप्रदान र कार्यसमन्वय कसरी प्रभावकारी बनाउने भन्ने विषयमा पनि छलफल केन्द्रित रहेको बताइएको छ।प्रधानमन्त्री शाहले बैंकिङ क्षेत्रमा देखिएका चुनौती, रेमिट्यान्स घटबढ, बाह्य क्षेत्रको अस्थिरता तथा त्यसले अर्थतन्त्रमा पार्ने प्रभावप्रति गम्भीर चासो व्यक्त गरेका थिए। उनले राष्ट्र बैंकले सामना गरिरहेका व्यावहारिक अवरोधबारे जानकारी लिँदै ती समस्याको समाधानमा सरकारले आवश्यक सहजीकरण गर्ने प्रतिबद्धता समेत जनाएका छन्।भेटका क्रममा गभर्नर पौडेलले राष्ट्र बैंकमा हाल दुई जना डेपुटी गभर्नर रिक्त रहेको विषय पनि उठाएका थिए। तर प्रधानमन्त्री शाहले यस विषयलाई तत्काल प्राथमिकतामा नराखेको स्रोतले जनाएको छ। हाल राष्ट्र बैंकमा कार्यरत १८ कार्यकारी निर्देशकमध्येबाट डेपुटी गभर्नर नियुक्त गर्ने प्रावधान रहेको छ।यसैबीच, गभर्नर पौडेलले दीर्घकालीन आर्थिक विकाससँग सम्बन्धित पूर्वाधार परियोजनाहरूबारे पनि आफ्ना धारणा राखेका थिए। फास्ट ट्र्याक निर्माण, रेलमार्ग विस्तार तथा क्षेत्रीय कनेक्टिभिटी बढाउने योजनाले अर्थतन्त्रलाई गति दिने उल्लेख गर्दै उनले काठमाडौं–दिल्ली रेलमार्गजस्ता परियोजनाहरूको सम्भाव्यता र वित्तीय व्यवस्थापनका पक्षमा सुझाव दिएका थिए।प्रधानमन्त्री शाहले छोटो अवधिमा देखिने परिणाममुखी कामलाई प्राथमिकता दिनुपर्ने बताउँदै बैंकिङ सुधार र आर्थिक गतिशीलताका लागि आवश्यक निर्णयहरू छिटो कार्यान्वयन गर्न आग्रह गरेका थिए। गभर्नर पौडेलले पनि ठूला परियोजनाहरू अघि बढेमा खर्च व्यवस्थापनमा सुधार र समग्र आर्थिक वृद्धि दुवैमा सकारात्मक प्रभाव पर्ने विश्वास व्यक्त गरेका छन्।यसअघि अर्थमन्त्री डा. स्वर्णिम वाग्लेले पनि गभर्नरसँग छलफल गर्दै बजेट निर्माण, राजस्व संकलन र वित्तीय व्यवस्थापनका विषयमा विचार आदानप्रदान गरेका थिए। नयाँ सरकार गठनसँगै राष्ट्र बैंकसँगको समन्वयात्मक सम्बन्धले आगामी दिनमा वित्तीय स्थायित्व र नीतिगत सुधारलाई नयाँ दिशा दिने अपेक्षा गरिएको छ।