राष्ट्रिय आर्थिक गणना सफल बनाउन सरकारी–निजी सहकार्य आवश्यक : सरोकारवाला

काठमाडौं — राष्ट्रिय आर्थिक गणना २०८२ लाई प्रभावकारी रूपमा सम्पन्न गर्न सरकारी निकाय र निजी क्षेत्रबीच सहकार्य अपरिहार्य रहेकोमा सरोकारवालाहरूले जोड दिएका छन्।

नेपाल उद्योग वाणिज्य महासङ्घ र राष्ट्रिय तथ्याङ्क कार्यालयको संयुक्त आयोजनामा सोमबार आयोजित राष्ट्रिय आर्थिक गणना २०८२ सञ्चालनसम्बन्धी अन्तरक्रियामा सहभागी उद्योगी–व्यवसायीहरूले गणनाको सफलताका लागि निजी क्षेत्रको सक्रिय सहभागिता आवश्यक रहेको बताएका हुन्।

कार्यक्रममा उद्योगी–व्यवसायीहरूले देशभर सञ्चालनमा रहेका उद्योग, व्यापार तथा सेवा क्षेत्रसँग सम्बन्धित वास्तविक तथ्याङ्क संकलन गर्न सरकारी संयन्त्र र निजी क्षेत्रबीच समन्वय हुनुपर्ने धारणा राखे। उनीहरूका अनुसार सहकार्य बिना गणनाको लक्ष्य हासिल गर्न कठिन हुने देखिन्छ।

राष्ट्रिय तथ्याङ्क कार्यालयले नेपालभर सञ्चालनमा रहेका आर्थिक क्रियाकलाप गर्ने प्रतिष्ठानहरूको आधारभूत विवरण सङ्कलन, प्रशोधन, विश्लेषण तथा प्रकाशन गर्ने उद्देश्यले राष्ट्रिय आर्थिक गणना २०८२ सञ्चालन गर्न लागेको हो। यस गणनाबाट देशको आर्थिक संरचना र गतिविधिको यथार्थ चित्र प्राप्त हुने अपेक्षा गरिएको छ।

अन्तरक्रियामा महासङ्घका उपाध्यक्ष हेमराज ढकालले राष्ट्रिय आर्थिक गणनाले देशको वास्तविक आर्थिक अवस्था, उद्योग–व्यवसायको स्थिति, लगानीको प्रवृत्ति र रोजगारीको तथ्याङ्क उपलब्ध गराउने बताए। उनले यस्ता तथ्याङ्क नीति निर्माणका लागि अत्यन्त महत्वपूर्ण हुने उल्लेख गर्दै निजी क्षेत्रको सक्रिय सहभागिता बिना गणना सफल नहुने स्पष्ट पारे।

ढकालले महासङ्घ आवश्यक सहयोग र समन्वयका लागि सधैं तयार रहेको पनि बताए। निजी क्षेत्रलाई विश्वासमा लिएर गणना प्रक्रिया अगाडि बढाउनुपर्नेमा उनले जोड दिए।

यस्तै, राष्ट्रिय तथ्याङ्क कार्यालयका सहसचिव ढुण्डिराज लामिछानेले राष्ट्रिय आर्थिक गणना २०८२ ले औद्योगिक, व्यापारिक तथा सेवा क्षेत्रको विस्तृत तथ्याङ्क संकलन गरी प्रमाणमा आधारित नीति निर्माणमा सहयोग पुर्‍याउने बताए। उनले प्राप्त तथ्याङ्कले दीर्घकालीन आर्थिक योजना बनाउन आधार प्रदान गर्ने विश्वास व्यक्त गरे।

राष्ट्रिय तथ्याङ्क कार्यालयका अनुसार दोस्रो राष्ट्रिय आर्थिक गणना आगामी वैशाख २ गतेदेखि असार ७ गतेसम्म सञ्चालन गरिनेछ। यस अवधिमा देशभरका आर्थिक प्रतिष्ठानहरूको तथ्याङ्क संकलन गरिनेछ।

कार्यक्रममा तथ्याङ्क कार्यालयका निर्देशक डा. वेदप्रसाद ढकालले राष्ट्रिय आर्थिक गणना २०८२ को आवश्यकता, उद्देश्य र महत्वबारे प्रस्तुतीकरण गरेका थिए। उनले गणनाबाट प्राप्त हुने तथ्याङ्कले निजी तथा सार्वजनिक क्षेत्र दुवैका लागि उपयोगी हुने बताए।

सरोकारवालाहरूले समयमै र पारदर्शी रूपमा गणना सम्पन्न गर्न सरकारी निकाय, निजी क्षेत्र र स्थानीय तहबीच समन्वय बढाउनुपर्ने आवश्यकता औंल्याएका छन्। उनीहरूका अनुसार सहकार्य र सहभागितामूलक प्रक्रिया अपनाएमा मात्र राष्ट्रिय आर्थिक गणनाले अपेक्षित नतिजा दिन सक्नेछ।