सरकारले ३३ अर्बको ट्रेजरी बिल जारी गर्ने

नेपाल सरकारले ३३ अर्ब रुपैयाँको ट्रेजरी बिल जारी गर्ने योजना बनाएको छ। सार्वजनिक ऋण व्यवस्थापन कार्यालयले २३ अर्ब रुपैयाँको ट्रेजरी बिल नवीकरण गर्ने र १० अर्ब रुपैयाँको नयाँ ट्रेजरी बिल जारी गर्ने तयारी गरेको छ। यो ट्रेजरी बिल बुधबार (जेठ १६ गते) जारी हुनेछ, र आज सोमबार (जेठ १४ गते) दिउँसो ३ बजे बोलकबोल हुनेछ।

९१ दिनको लागि ५ अर्ब रुपैयाँको ट्रेजरी नवीकरण र ५ अर्बको नयाँ ट्रेजरी जारी हुनेछ। यो ट्रेजरी भदौ ११ गते परिपक्व हुनेछ। १८२ दिनको लागि ६ अर्ब रुपैयाँको ट्रेजरी नवीकरण र ५ अर्बको नयाँ ट्रेजरी जारी हुनेछ, जसको परिपक्वता मंसिर ११ गते हुनेछ। १ वर्षको लागि १२ अर्ब रुपैयाँको ट्रेजरी नवीकरण हुनेछ, र यो ट्रेजरी २०८२ जेठ ४ गते परिपक्व हुनेछ।

ट्रेजरी बिल भनेको सरकारको अल्पकालीन ऋणपत्र हो, जुन १ वर्ष वा कम समयको लागि जारी गरिन्छ। यसलाई सरकारले आवश्यक परेको छोटो अवधिको ऋण जुटाउन प्रयोग गर्छ। ट्रेजरी बिलको प्रमाणपत्र खरिद गर्न, वैधानिक तरलता अनुपात, स्थायी तरलता सुविधा, तथा अन्तर बैंक कारोबारमा प्रयोग गर्न सकिन्छ। व्यक्तिले पनि ट्रेजरी बिलको प्रमाणपत्र धितो राखेर बैंक तथा वित्तीय संस्थाबाट ऋण लिन सक्छन्। सबै बैंक, वित्तीय संस्था, संगठित संस्था, र सर्वसाधारण नागरिकले ट्रेजरी बिलको बोलकबोलमा सहभागी हुन सक्छन्। बोलकबोलमा सबैभन्दा बढी मूल्य तोक्ने संस्थालाई प्राथमिकता दिइन्छ र क्रमैसँग आह्वान रकमसम्म ट्रेजरी बिल बाँडिन्छ।