डब्ल्युटीओको व्यापार तथा वातावरण समितिको अध्यक्षमा नेपाल चयन

नेपाल विश्व व्यापार सङ्गठन (डब्ल्युटीओ) अन्तर्गतको व्यापार तथा वातावरण समितिको अध्यक्षमा चयन भएको छ। संयुक्त राष्ट्रसङ्घ तथा अन्य अन्तरराष्ट्रिय सङ्घसङ्गठनका लागि जेनेभास्थित नेपालको स्थायी नियोगका अनुसार फागुन २७ गते बसेको महासभा बैठकले नेपाललाई एक वर्षे कार्यकालका लागि सर्वसम्मत रूपमा समितिको अध्यक्ष चयन गरेको हो।डब्ल्युटीओअन्तर्गतको यो समिति सदस्य राष्ट्रहरूबीच व्यापार नीतिले वातावरणमा पार्ने प्रभाव तथा वातावरणीय नीतिले अन्तरराष्ट्रिय व्यापारमा पार्ने प्रभाव सम्बन्धी विषयमा छलफल तथा समन्वय गर्ने महत्वपूर्ण मञ्च हो। यस समितिले विशेषगरी जलवायु परिवर्तन, दिगो विकास र वातावरणमैत्री व्यापार नीतिसम्बन्धी विषयमा सदस्य राष्ट्रहरूबीच सहकार्य बढाउने काम गर्दै आएको छ।नेपाल हाल अल्प विकसित राष्ट्र (LDC) को सूचीबाट बाहिरिने प्रक्रियामा रहेको अवस्थामा यस्तो महत्वपूर्ण जिम्मेवारी प्राप्त हुनु अन्तरराष्ट्रिय स्तरमा नेपालको कूटनीतिक सक्रियता र विश्वासको संकेतका रूपमा हेरिएको छ। यस भूमिकाले नेपाललाई डब्ल्युटीओका सदस्य राष्ट्रहरूसँग नजिकबाट सहकार्य गर्दै आफ्नो व्यापार नीति तथा सम्भावनालाई विश्वव्यापी बजारसँग जोड्न थप अवसर प्रदान गर्ने अपेक्षा गरिएको छ।संयुक्त राष्ट्रसङ्घ तथा अन्य अन्तरराष्ट्रिय सङ्घसङ्गठनहरूका लागि नेपालका स्थायी प्रतिनिधि रामप्रसाद सुवेदीले समितिमा नेपालको प्रतिनिधित्व गर्नुहुनेछ। उहाँको नेतृत्वमा नेपालले व्यापार र वातावरणबीच सन्तुलन कायम गर्ने विषयमा अन्तरराष्ट्रिय स्तरमा सक्रिय भूमिका खेल्ने विश्वास गरिएको छ।