नेपाल आयल निगमले सेयरधनीलाई १० प्रतिशत लाभांश वितरण गर्ने

नेपाल आयल निगमले आफ्ना सेयरधनीहरूलाई १० प्रतिशत नगद लाभांश वितरण गर्ने निर्णय गरेको छ। निगमको चैत ४ गते बसेको सञ्चालक समिति बैठकले चुक्ता पुँजीको १० प्रतिशत (करसहित) नगद लाभांश वितरण गर्ने प्रस्ताव पारित गरेको हो ।

निगमको तथ्याङ्कअनुसार चुक्ता पुँजी ११ अर्ब रुपैयाँ रहेको छ। सोही आधारमा सेयरधनीहरूलाई कुल १ अर्ब १० करोड रुपैयाँ बराबरको लाभांश वितरण गरिनेछ। यो प्रस्तावलाई अनुमोदन गर्न निगमले चैत २९ गते उद्योग, वाणिज्य तथा आपूर्ति मन्त्रालयको सभाकक्ष, सिंहदरबारमा अपरान्ह १ बजे ४३औं वार्षिक साधारण सभा बोलाएको छ।

साधारण सभाले सञ्चालक समितिको प्रतिवेदन, लेखापरीक्षकको प्रतिवेदनसहित आर्थिक वर्ष २०८०/८१ को वासलात, नाफा-नोक्सान हिसाब र नगद प्रवाह विवरण पारित गर्नेछ। साथै, लेखापरीक्षकको नियुक्ति, पारिश्रमिक र खर्च अनुमोदन गर्नुका अतिरिक्त आर्थिक वर्ष २०८१/८२ को लेखापरीक्षणका लागि महालेखा परीक्षकको कार्यालयको परामर्शअनुसार लेखापरीक्षक नियुक्त गरी पारिश्रमिक तोक्ने एजेन्डा पनि समावेश छन्।

यसैगरी, साधारण सभाको निर्णय पुस्तिकामा हस्ताक्षर गर्न सेयरधनी र सञ्चालकहरूका तर्फबाट एक-एक जना प्रतिनिधि चयन गरिनेछ।

यसअघि निगमले आर्थिक वर्ष २०७६/७७ मा सेयरधनीहरूलाई २० प्रतिशत नगद लाभांश वितरण गरेको थियो।